Nëse i keni ndjekur në videot që mund t’ju rastisin nëpër rrjetet sociale, afrikanët kanë një mënyrë unike për të luajtur futboll, që ndryshon shumë nga europianët apo amerikano-latinët. Ata bëjnë disa lëvizje të veçanta, por jo vetëm.

Ata e shohin ndryshe futbollin, duke e përshtatur me mënyrën e tyre të jetesës. Së fundmi një video virale po qarkullon në rrjet, për shkak se lojtarët e njërit ekip rrëzohen të gjithë në tokë dhe lejojnë kundërshtarët të shënojnë.

Ky episod ka ndodhur në Lojërat Phillys, kompeticion i themeluar në vitin 1992 në Afrikën e Jugut, që kishte si qëllim rritjen e talenteve të rinj dhe afrimin e popullit të thjeshtë, që nuk kishte luksin të shkonte në stadiumet e mëdha.

Ky kompeticion, i ngjashëm me ndeshjet e Shallvareve dekada më parë në kryeqytetin tonë, tashmë është shumë i ndjekur dhe ka fituar një popullaritet të madh, pasi regjistrohen gati 10 mijë të pranishëm për çdo ndeshje të organizuar.

Ngjarja unike ka ndodhur në ndeshjen mes Isithembisos dhe Pandhës. Ishte Isithembiso, që kishte fituar në ndeshjen e parë me rezultat të pastër 3-1, teksa edhe në përballjen e dytë ata po fitonin me shifrat 0-3 deri në minutat shtesë.

Kur koha po shkonte drejt fundit, lojtarët afrikanë u shtrinë në tokë dhe lejuan kundërshtarët të shënojnë vetëm përballë portierit. Sipas medieve, ky veprim bëhet për mirësjelljeje, me skuadrën fituese, që dëshiron të lejojë që ai që është i destinuar të humbasë të shkurtojë distancën.

Afrikanët nuk e pëlqejnë filozofinë evropiane të futbollit, që edhe nëse e kanë siguruar fitoren, nuk i ndalin golat. Ata janë më të dhembshur ndaj kundërshtarit dhe lojtarët europianë i krahasojnë me robotët, për shkak të profesionalizmit maksimal që ata tregojnë në fushë.