Një 41-vjeçar është arrestuar nga policia e Tiranës, i akuzuar për armëmbajtje pa leje.
Sipas bluve të kryeqytetit u arrestua Saimir Allmuça, të cilit iu sekuestruan 2 armë zjarri një pistoletë dhe një pushkë, 1 armë sportive, 1 armë e ftohtë, municion luftarak dhe emblema policie.
Mësohet se ngjarja ka ndodhur në Rrugën e Dibrës, ku shërbimet e Policisë kanë ndaluar fillimisht Allmuçën teksa po lëvizte me makinë. Gjatë kontrollit të automjetit, iu gjet e iu sekuestrua një armë e ftohtë (thikë).
Më tej, gjatë kontrollit në banesën e tij, u gjetën e sekuestruan 2 armë zjarri, pistoletë dhe pushkë, 1 armë sportive, 1 armë e ftohtë, municion luftarak dhe emblema policie”, thotë policia.
Njoftimi i policisë:
Finalizohet nga Komisariati i Policisë Nr. 4, operacioni policor “The Holder”. Sekuestrohen 2 armë zjarri(pistoletë dhe pushkë), 1 armë sportive, 1 armë e ftohtë, municion luftarak dhe emblema policie, vihet në pranga poseduesi.
Shërbimet e Komisariatit të Policisë Nr. 4, në kuadër të veprimeve për goditjen e veprimtarive të paligjshme në të gjitha fushat e shfaqjes së saj, bazuar në inteligjencën policore, organizuan dhe finalizuan operacionin policor “ The Holder” si rezultat i të cilit u arrestua shtetasi S. A., 41 vjeç, banues në Tiranë.
Gjatë operacionit, në Rrugën e Dibrës, shërbimet e Policisë kanë ndaluar automjetin me drejtues shtetasin S. A. Gjatë kontrollit të automjetit, iu gjet e iu sekuestrua një armë e ftohtë(thikë). Më tej, gjatë kontrollit në banesën e këtij shtetasi, shërbimet e Policisë, gjetën e sekuestruan 2 armë zjarri(pistoletë dhe pushkë), 1 armë sportive, 1 armë e ftohtë, municion luftarak dhe emblema policie.
Materialet procedurale iu referuan Prokurorisë së Tiranës, për veprime të mëtejshme.