Italia është përfshirë nga kaosi ditën e sotme, teksa është goditur nga një tërmet, nga një cunam e po ashtu nga një shpërthim vullkani.
Lëkundjet me magnitudë 4.6 dhe cunami 1.5 metra, i cili nuk arriti në bregdet, si dhe një aktivitet i ri vullkanik u regjistruan të dielën dhe të hënën në mëngjes (5 dhjetor) në ishullin italian të Stromboli.
Mësohet se cunami është shkaktuar nga shkëputja e shkëmbinjve në zonën e vullkanit Sierra del Fuoco dhe përfundimi i tyre ishte në det.
Sipas informacioneve nga Mbrojtja Civile, në ishull kanë rënë sirena dhe është vënë në fuqi një alarm portokalli, por nuk raportohet për dëme. Aktiviteti vullkanik në anën shumë aktive juglindore të vullkanit vazhdoi edhe sot (të hënën) dhe llava mbërriti edhe në det.
Stromboli në Itali dhe Semeru në Indonezi shpërthyen në të njëjtën ditë, një javë pas Mauna Loa në Hawaii.
Shpërthimet e fundit, megjithatë, nuk janë aspak të lidhura me njëra-tjetrën. David Rothery, profesor i gjeoshkencave planetare në Universitetin e Open të Britanisë, tha për Newsweek: “Ato janë mijëra kilometra larg njëri-tjetrit dhe nuk ka asnjë lidhje të mundshme mes tyre.”
Nga të tre, mali Semeru është vullkani më vdekjeprurës, tha Rothery. Është 3675 metra i lartë dhe është vullkani më i madh në ishullin Java, Indonezi. Është gjithashtu një nga vullkanet më aktive në ishull.
“Stromboli është një nga vullkanet më aktivë në botë. Ai ka shpërthyer pothuajse vazhdimisht për 90 vitet e fundit, kështu që ky shpërthim i fundit nuk është befasi. Por është shumë më e madhe se zakonisht”, shtoi Rothery.
