Një grua nga Britania e Madhe ka treguar se u detyrua që të varroste bashkëshortin e saj në një varr pa emër në Kepin e Gjelbër. Sipas saj, ai u sëmur papritur gjatë pushimeve të tyre.
Mediat e huaja shkruajnë se, vdekja e tij e papritur, së bashku me atë të një tjetër turisti britanik, e çon në të paktën 10 numrin e shtetasve britanikë që kanë humbur jetën gjatë pushimeve “all inclusive” në këtë destinacion që nga viti 2023.
74-vjeçari Colin Timson, ish-punonjës i një magazinimi me pirun, ndodhej me pushime në ishullin afrikan së bashku me bashkëshorten e tij, Jacqueline, kur filloi të vuante nga të vjella dhe diarre.
Të nesërmen në mëngjes, gruaja u kthye nga mëngjesi dhe e gjeti të rrëzuar pa ndjenja. Ai u dërgua në spital, por ndërroi jetë po atë mbrëmje, në korrik të vitit 2024.
Tragjedi në pushimet “all inclusive”! Britaniku vdes në Kepin e Gjelbër, e veja: E varrosa në një varr pa emër
Sipas autoriteteve të Kepit të Gjelbër, shkaku i vdekjes ishte gastroenterit akut dhe hemorragji në traktin tretës, të cilat çuan në dehidrim, anemi të rëndë dhe shok septik.
Ndërkohë 69-vjeçarja, e cila gjithashtu u sëmur me dhimbje të forta barku, tha se u detyrua ta varroste bashkëshortin vetëm tre ditë pas vdekjes, pasi besonte se siguracioni i udhëtimit nuk do të mbulonte shpenzimet për kthimin e trupit në Britani.
“Më thanë se në Kepin e Gjelbër nuk kishte mundësi për kremacion. Nuk munda të sillja as hirin e tij në shtëpi. Tani ai prehet në një varr pa emër, i vetëm, mijëra kilometra larg familjes,” tha ajo.
Çifti, nga Heighington pranë Lincolnit, kishte vizituar edhe më parë Kepin e Gjelbër dhe kishte paguar rreth 2 mijë paund për një udhëtim të dytë me kompaninë turistike TUI.
Megjithatë, Jacqueline, ish-punonjëse fabrike në pension, tha se hoteli ku qëndruan, Riu Funana, nuk ishte në të njëjtin standard si herën e parë.
“Disa ushqime dukeshin të pagatuara mirë dhe shërbeheshin të vakëta. Tualetet pranë pishinës ishin plot me buburreca të ngordhura dhe ne nuk hynim në ujë sepse dukej i verdhë,” u shpreh ajo.
Ajo shtoi se, pasi bashkëshorti u dërgua nga klinika në spital, stafi i hotelit i tha të kthehej në hotel dhe ta vizitonte të nesërmen.
“Nuk e mora vesh që kishte vdekur derisa mbërrita në spital. Kur dëgjova lajmin, bota m’u shemb. Gjithçka ishte si në mjegull.”
Mbi 2.500 turistë kanë ngritur padi
Më shumë se 2.500 persona që kanë vizituar Kepin e Gjelbër që nga viti 2022 kanë ndërmarrë veprime ligjore kundër TUI, pasi pretendojnë se janë infektuar me baktere si Salmonela, E. coli dhe Shigella.
Rreth 600 persona janë shtuar vetëm në katër muajt e fundit, pasi mediat ngritën alarmin në janar.
Avokati Jatinder Paul, nga firma ligjore Irwin Mitchell, e cila përfaqëson turistët, tha se është tronditëse që vazhdojnë të kontaktohen nga qindra persona të tjerë që pretendojnë se pushimet e tyre janë shkatërruar nga sëmundje të rënda.
Ai shtoi se dëshmitë e familjeve që kanë humbur të afërmit janë tepër të dhimbshme.
Mes britanikëve të tjerë që kanë humbur jetën në Kepin e Gjelbër janë edhe Elena Walsh, 64 vjeçe nga Birmingham, Jane Pressley, 62 vjeçe nga Gainsborough, Mark Ashley, 55 vjeç nga Bedfordshire dhe Karen Pooley, 64 vjeçe nga Gloucestershire, e cila vdiq pasi u sëmur në resortin Riu Funana, i njëjti hotel ku qëndroi edhe Colin Timson.
Sipas ligjit britanik, kompanitë që ofrojnë paketa turistike mbajnë përgjegjësi ligjore për standardin e të gjitha shërbimeve të përfshira në paketë, përfshirë ushqimin, higjienën dhe akomodimin, edhe kur ato ofrohen nga hotele partnere jashtë vendit.
Nga ana e saj, TUI shprehu ngushëllime për familjet e prekura dhe tha se ka ofruar mbështetje në të dyja rastet. Kompania deklaroi gjithashtu se në dokumentacionin e saj nuk figurojnë raportime për të vjella apo diarre gjatë kohës së pushimeve dhe se, sipas shënimeve të stafit, Jacqueline Timson kishte informuar se bashkëshorti i saj nuk ishte ndier mirë që gjatë fluturimit drejt Kepit të Gjelbër.
