Kryeministri i Kosovës Albin Kurti ka përfunduar takimin me përfaqësuesin e lartë të Bashkimit Europian, Josep Borrell dhe me të dërguarin e posaçëm për dialogun Kosovë-Serbi, Mirosllav Lajçak.

Lajmin e ka bërë të ditur Borrell, me anë të një postimi në Twitter, ku shprehet se synimi është që të gjendet zgjidhje për tensionet e vazhdueshme mes Prishtinës zyrtare dhe Serbisë.

“Situata në veri të Kosovës vazhdon të jetë shumë e tensionuar. Sot, ne synojmë të gjejmë zgjidhje për deeskalim të menjëhershëm dhe një rrugë përpara”, ka shkruar ai.

Nga ana tjetër, menjëherë pas katij takimi, Borrell ka pritur në takim presidentin e Serbisë, Aleksandër Vuçiç. Edhe pse ndërkombëtarët i mëshuan një takimi të përbashkët me dy liderët, kjo nuk u arrit, dhe Kurti e Vuçiç u ulën në tryezë veçmas.