Detaje të reja janë zbardhur në lidhje me ngjarjen e ndodhur ditën e sotme në veri të Kosovës, ku dy vëllezër serbë u plagosën me armë nga një efektiv i Forcave të Sigurisë së Kosovës.
Mësohet se autori i plagosjes është identifikuar si Azim Kurtaj, i cili është ushtar i Forcave të Sigurisë së Kosovës. Ai dyshohet se sot, rreth orës 15:20 ka qëlluar me armë zjarri ndaj një 11-vjeçar dhe një 21-vjeçar serb.
Rasti është konfirmuar edhe nga Policia e Kosovës, të cilët e kanë shoqëruar për në Policinë Rajonale të Ferizajt, 33-vjeçarin si të dyshuarin kryesor. Nga vendi i ngjarjes, hetuesit rajonal kanë konfiskuar armën e zjarrit, me të cilën dyshohet se është kryer vepra penale.
Por, kush është ushtari i FSK-së Azem Kurtaj?
Azem Kurtaj, është djali i dëshmorit të Ushtrisë Çlirimtare të Kosovës, Danush Kurtajt. Danush Kurtaj lindi në fshatin Gabrricë të komunës së Kaçanikut. Në qershor të vitit 1998, ai i bashkohet luftëtarëve të lirisë, të Ushtrisë Çlirimtare të Kosovës.
Danush Kurtaj ka ndihmuar edhe në furnizimin e UÇK-së me mjete, pajisje të nevojshme dhe me artikuj ushqimorë. Më 9 gusht të vitit 1998, ka qenë në radhët e njësitit të parë çlirimtarë të rrethinës së Kaçanikut.
Danush Kurtaj u plagosur rëndë me 21 maj 1999, për të vdekur një ditë më pas. I biri i dëshmorit Danush Kurtaj, Azem Kurtaj më 25 nëntor, ishte mes ushtarëve të Kosovës që u dekorua nga Ushtria e Shqipërisë.
