Presidenti i SHBA-ve, Donald Trump, ka paguar më shumë se 5.6 milionë dollarë dëmshpërblim ndaj shkrimtares E. Jean Carroll, tre vite pasi një juri e shpalli përgjegjës në një çështje civile për abuzim seksual dhe shpifje. Avokatja e Carroll, Roberta Kaplan, konfirmoi se pagesa është kryer dhe se klientja e saj ka marrë shumën e përcaktuar nga vendimi i gjykatës, e cila përfshin 5 milionë dollarët e dëmshpërblimit, si dhe interesat e akumuluara gjatë procesit të apelimit.
“Jemi të kënaqur të njoftojmë se ajo ka marrë pagesën e akorduar nga juria si rezultat i këtij vendimi”, deklaroi Kaplan. Trump kishte kërkuar shtyrjen e pagesës për të ndjekur një tjetër përpjekje ligjore pranë Gjykatës së Lartë amerikane, por javën e kaluar gjyqtari që mbikëqyr çështjen urdhëroi kryerjen e pagesës.
Përfaqësuesit e ekipit ligjor të Trump nuk kanë komentuar mbi pagesën. Carroll, ish-kolumniste reviste, e cila sot është 82 vjeçe, ka akuzuar Trump se e ka sulmuar në mesin e viteve ’90 në një dhomë prove të dyqanit Bergdorf Goodman në Manhattan. Ajo gjithashtu e paditi për shpifje pas një reagimi të Trump në platformën e tij Truth Social në vitin 2022, ku ai mohoi akuzat.
Në vitin 2023, një juri në Nju Jork vendosi në favor të Carroll dhe i dha asaj dëmshpërblimin prej 5 milionë dollarësh. Trump ka mohuar vazhdimisht akuzat. Shuma e dëmshpërblimit ishte vendosur në një llogari të kontrolluar nga gjykata menjëherë pas vendimit dhe u mbajt aty gjatë kohës që vijonte procesi i apelimit.