Prej disa kohësh, në Turqi kanë nisur operacione të gjera policore të zhvilluara në Stamboll, në kuadër të një hetimi për narkotikë. Së fundmi janë bërë 22 ndalime të personazheve të njohur të ekranit, mes tyre edhe aktorja Beren Saat së bashku me bashkëshortin e saj, Kenan Dogulu.
Sipas raportimeve të “Anadolu Agency”, hetimi po zhvillohet nga Zyra e Kryeprokurorit Publik të Stambollit për Hetimet e Kontrabandës, Narkotikëve dhe Krimit Ekonomik.
Autoritetet po hetojnë dyshimet për veprat penale që lidhen me “posedimin e substancave narkotike ose stimuluese për përdorim personal” dhe “lehtësimin e përdorimit të narkotikëve”. Hetimet vijojnë dhe deri më tani nuk janë bërë publike detaje të tjera mbi përfshirjen individuale të të dyshuarve.
Beren Saat është një nga aktoret më të njohura të Turqisë dhe ka fituar popullaritet ndërkombëtar përmes roleve të saj në seriale dhe filma të suksesshëm.
Publiku shqiptar e njeh veçanërisht nga serialet televizive “Forbidden Love” dhe “Fatmagul’un Suçu Ne?”, ndërsa në platformën Netflix ajo ka luajtur në serialin “The Gift” dhe filmin “Last Call for Istanbul”.
Autoritetet turke nuk kanë dhënë ende një deklaratë përfundimtare mbi çështjen, ndërsa hetimi mbetet në zhvillim.
