Modelja e famshme, Bella Hadid, ka ngritur sërish shqetësime për gjendjen e saj shëndetësore, pasi ka treguar se po përjeton një përkeqësim të sëmundjes së Lyme-t, me të cilën përballet prej vitesh.
Ajo ka ndarë në rrjete sociale një fotografi duke qarë, ndërsa shpjegoi se simptomat nuk po i lehtësohen pavarësisht trajtimeve dhe këshillave të mjekëve.
“Nuk kam arritur ta kaloj këtë përkeqësim të gjendjes… Kam fjetur 11 orë. Përsëri… Fle çdo ditë gjatë ditës. Kam provuar çdo trajtim dhe çdo protokoll që më ka rekomanduar secili mjek që kam vizituar. Ende asgjë nuk po ndihmon”, shkruan Bella në postimin e saj.
Ajo vuri në dukje se po qëndron e hidratuar, duke sqaruar:
“Po, kam pirë ujë. Dhe jo, nuk dola për shëtitje, sepse më merrej fryma edhe vetëm duke ecur deri në kuzhinë. Nuk besoj se kam qoftë edhe një qelizë të vetme të trurit që po funksionon, dhe dy të fundit po grinden me njëra-tjetrën. Prandaj, nëse ndonjëherë ju kam thënë në një ditë të keqe të mbani ditar, e tërheq atë që kam thënë dhe kërkoj falje”.
Postimi i modeles së famshme shkaktoi shqetësime në lidhje me shëndetin e saj, dhe të nesërmen, Hadid postoi një foto të re në Instagram, duke shpjeguar se ajo thjesht po përpiqej të ekuilibronte jetën e saj të përditshme dhe kishte nevojë të shfryhej.
