Vështirë se mund të gjendet një pamje martesore më ikonike dhe më e referuar sesa ajo që veshi Bianca Perez-Mora Macias më 12 maj 1971. Për çdo nuse që kërkon një alternativë ndaj fustanit tradicional të bardhë, emri i Bianca Jagger mbetet një burim i pashmangshëm frymëzimi.
Ajo u martua me këngëtarin e grupit Rolling Stones, Mick Jagger, vetëm nëntë muaj pasi u njohën në një koncert rock në Francë. Për ceremoninë civile në Saint-Tropez, ajo zgjodhi një kostum elegant dy pjesësh të krijuar nga stilisti legjendar Yves Saint Laurent, një zgjedhje që do të hynte përgjithmonë në historinë e modës martesore.
Edhe pse ekzistojnë vetëm pak fotografi të çiftit duke dalë nga bashkia e Saint-Tropez-it, ato mjaftuan për ta kthyer këtë paraqitje në një simbol të stilit. Pikërisht kjo estetikë duket se ka shërbyer si frymëzim për Dua Lipën në ceremoninë e saj civile me aktorin Callum Turner në Londër. Fotografitë e çiftit duke dalë nga Old Marylebone Town Hall, ndërsa miqtë dhe familjarët i përshëndesnin me konfeti, sollën menjëherë ndër mend skenat e famshme të vitit 1971.
Pamja e Dua Lipës kishte shumë elemente të përbashkëta me atë të Bianca Jagger. Këngëtarja veshi një xhaketë ngjyrë fildishi me prerje që theksonte siluetën dhe kopsa të arta, të kombinuar me një fund asimetrik nga Schiaparelli, dizajnuar nga Daniel Roseberry. Ajo e kompletoi paraqitjen me taka Christian Louboutin, bizhuteri Bulgari dhe një kapelë me strehë të gjerë nga Stephen Jones. Kapela ishte e veshur nga brenda me fletë ari, duke krijuar një efekt ndriçimi natyral në fytyrë.
Sipas ekspertëve të modës, Dua Lipa dhe stilisti i saj Lorenzo Posocco kishin studiuar me kujdes pamjen origjinale të Bianca Jagger. Kjo sepse shumë homazhe të mëparshme nga personazhe të njohur kanë interpretuar gabimisht veshjen e vitit 1971 si një kostum me pantallona. Mes tyre janë Emily Ratajkowski, e cila u martua me një kostum të verdhë me pantallona në vitin 2018, si dhe Zendaya, e cila u shfaq në Met Gala me një kostum të bardhë dhe kapelë të ngjashme përpara se të zbulohej martesa e saj me Tom Holland.