Një faturë me çmimin prej 44 eurosh për dy akullore në qendrën historike të Romës ka ndezur debat në rrjetet sociale, pasi një çift turistësh nga SHBA pretendon se nuk ishte informuar qartë për kostot shtesë që iu aplikuan porosisë së tyre. Ngjarja ndodhi pranë Piazza Navona, një nga zonat më të frekuentuara nga turistët në kryeqytetin italian. Nicole Ann, një turiste nga Florida, publikoi në internet fotot e akulloreve dhe faturës, duke treguar se ajo dhe partneri i saj mbetën të habitur kur në arkë mësuan shumën që duhej të paguanin.
Sipas saj, çifti porositi dy gota akulloreje me nga tre shije secila. Gjatë përgatitjes, stafi shtoi edhe përbërës të tjerë, si makarona dhe kanolini me fistikë, të cilat turistët i konsideruan si garnitura të zakonshme dhe jo si produkte me pagesë shtesë. Nga fatura e publikuar rezulton se dy porcionet e akullores kushtonin nga 12 euro secila. Më pas janë shtuar tarifat për kremin e rrahur, dy makarona dhe kanolinit me fistikë, duke e çuar totalin në 44 euro.
Postimi i turistes amerikane u përhap me shpejtësi në rrjetet sociale dhe nxiti reagime të shumta. Në rrjet u kritikua mungesa e transparencës në komunikimin e çmimeve, ndërsa shumë argumentuan se tarifat ishin të afishuara dhe se çmimet në zonat më turistike të Romës janë zakonisht më të larta.