Një nxënës i shkollës së mesme në Georgia të Shteteve të Bashkuara të Amerikës ka bërë një rekord kombëtar. Patrick Pruitt është pranuar në 264 kolegje dhe universitete, si dhe ka marrë mbi 17 milionë dollarë oferta bursash.
Mediat e huaja shkruajnë se, Patrick u diplomua nga Shkolla e Mesme Woodland në McDonough me nderime. Ai përfundimisht u regjistrua në Kolegjin Knox në Illinois.
Fillimisht, Pruitt aplikoi në 50 institucione. Kur pa se letrat e pranimit po vinin me vërshim, ai vendosi që të provonte veten për të parë se në sa kolegje mund të pranohej.
Në total, ai dërgoi 270 aplikime dhe u pranua në 264. Vetëm gjashtë shkolla e refuzuan aplikimin e tij.
Duke cituar nënën e tij, Alicia Brantley, “People” shkruan se djali donte të shqyrtonte të gjitha mundësitë dhe madje arriti që të shmangte tarifat e aplikimit.
Ajo u shpreh se është ‘shumë krenare’ për djalin e saj, të cilin e përshkroi si ‘shumë të motivuar dhe elastik’.
Për të arritur misionin e tij, Patrick u regjistrua në programin e Pranimeve të Drejtpërdrejta të Bordit të Kolegjit, ku kolegjet dhe universitetet ofrojnë pranime bazuar në performancën akademike.
Ai gjithashtu përdori Aplikacionin e Përbashkët, një platformë online falas dhe e centralizuar e përdorur nga studentët për të aplikuar në programe pasuniversitare në mbi një mijë kolegje dhe universitete në Shtetet e Bashkuara të Amerikës dhe në mbarë botën. Ai u përqendrua gjithashtu në institucionet e specializuara në shkencat mjedisore.
