Zhdukja pa gjurmë e gjashtë adoleshentëve në Kanada vazhdon të mbetet mister edhe 31 vite pas ngjarjes. Chad Smith, 18 vjeç, dhe pesë miqtë e tij, Jay Boyle, Robbie Rumboldt, Michael Cummins, Danny Higgins dhe Jamie Lefebvre, u panë për herë të fundit në orët e para të 17 marsit 1995, në Pickering të Ontarios. Të rinjtë, të moshës 16 deri në 18 vjeç, kishin marrë pjesë në një festë në një banesë dhe më pas dyshohet se ishin drejtuar drejt marinës East Shore, në gjirin Frenchman, pranë liqenit Ontario.
Sipas versionit zyrtar, grupi mund të ketë marrë pa leje një motobarkë rreth katër metra të gjatë dhe një biçikletë uji, duke u futur në liqen pa jelekë shpëtimi. Policia dyshoi se mjetet lundruese ishin përmbysur dhe se adoleshentët kishin humbur jetën nga hipotermia. Megjithatë, pavarësisht një operacioni të gjerë kërkimi me përfshirjen e policisë, Rojës Bregdetare, ushtrisë dhe qindra vullnetarëve, nuk u gjetën as trupat e të rinjve dhe as mbetjet e mjeteve lundruese.
I vetmi objekt i zbuluar ishte një bidon karburanti, i cili doli në breg pranë Wilsonit në Nju Jork, në anën tjetër të liqenit Ontario, rreth dy javë pas zhdukjes. Një dëmtim i vogël në bidon bëri që hetuesit ta lidhnin atë me motobarkën e humbur, por kjo nuk u konsiderua provë përfundimtare. Hetimet treguan se tre prej adoleshentëve ishin filmuar duke hyrë në festë rreth orës 01:48, ndërsa tre të tjerët nuk shfaqeshin në pamjet e kamerave. Autoritetet besojnë se grupi mund të jetë larguar nga marina rreth orës 03:00, por nuk ekzistojnë pamje që tregojnë të gjashtë të rinjtë duke hipur në mjete.
Zhdukja u raportua në polici vetëm të nesërmen, ndërsa kërkimet në liqen nisën rreth 36 orë pas telefonatave të para. Pas rreth 72 orësh, kërkimet ajrore dhe zhytjet u ndërprenë, pasi autoritetet mendonin se të rinjtë ishin mbytur. Tashmë, kushërira e Chad Smith, Jamie Hammond, ka nisur një hetim të pavarur për të zbuluar se çfarë ndodhi realisht atë natë. Ajo ka krijuar edhe një podcast kushtuar çështjes, përmes të cilit synon të intervistojë persona të lidhur me ngjarjen dhe të publikojë provat që mund të dalin gjatë kërkimeve.
Gjatë viteve janë ngritur teori të ndryshme, nga largimi vullnetar i të rinjve deri te mundësia e trafikimit të tyre. Megjithatë, familjarët kërkojnë fakte konkrete dhe jo spekulime. Teoria zyrtare e mbytjes vazhdon të konsiderohet e mundshme, por ajo nuk është vërtetuar përfundimisht, pasi asnjë prej gjashtë adoleshentëve, sendet e tyre personale apo mjetet lundruese nuk janë gjetur.