Një histori e jashtëzakonshme humanizmi vjen nga Kina, ku një mësues i edukimit fizik ka kthyer jetën e tij në një mision për të ndihmuar fëmijët pa familje, duke u bërë një figurë frymëzuese për mijëra njerëz. Mai Jian, 52 vjeç, prej më shumë se tre dekadash ka strehuar dhe rritur afro 300 fëmijë, kryesisht jetimë ose nga familje shumë të varfra. Që nga viti 1995, ai ka hapur dyert e një shtëpie të quajtur “Dream Home”, ku aktualisht jetojnë rreth 20-30 fëmijë në të njëjtën kohë. Shumë prej tyre, falë përkujdesjes dhe mbështetjes së tij, kanë arritur të ndërtojnë një të ardhme të suksesshme.
Disa janë bërë sportistë profesionistë, të tjerë ushtarë, funksionarë publikë apo profesorë universitarë. Mbi 100 prej tyre kanë përfunduar studimet e larta, ndërsa rreth 50 kanë arritur nivelet më të larta në sport. Historia e tij lidhet edhe me fëmijërinë e vështirë që ka kaluar. I lindur në një familje të varfër në një zonë rurale, ai arriti të ndjekë universitetin falë talentit në sport. Vendimi për të ndihmuar fëmijët erdhi kur takoi një nxënës të braktisur, i cili vuante për ushqim dhe kujdes.
Për t’i mbështetur fëmijët, Mai ka shpenzuar të gjitha kursimet e tij, ka marrë borxhe dhe ka punuar punë të ndryshme. Në mungesë të tij, familjarët e ndihmonin në përkujdesjen ndaj fëmijëve. Ai gjithmonë ka theksuar rëndësinë e sportit si një rrugë drejt suksesit dhe disiplinës, duke thënë: “Sporti është i drejtë, merr atë që jep”. Një tjetër mesazh i tij i fortë për fëmijët ka qenë: “Mos urreni askënd, sepse urrejtja të dëmton edhe ty”.