Brooklyn Beckham ndau me ndjekësit e tij në rrjetet sociale një fotografi intime të bashkëshortes, Nicola Peltz, duke fjetur në shtrat. Imazhi në fjalë mori menjëherë gjithë vëmendjen, pasi vjen në një kohë kur vazhdojnë spekulimet për përçarjen me familjen Beckham.
Në postin në “Instastory”, Nicola është në gjumë, ndërkohë bashkëshorti i saj i ka gjetur momentin për t’a fotografuar. Brooklyn e shoqëron foton me një dedikim plot dashuri, duke treguar edhe një herë se martesa e tyre mbetet prioriteti i tij.
Kujtojmë se postimi erdhi vetëm pak ditë pasi Victoria Beckham bëri një tjetër përpjekje publike për t’u afruar me djalin e saj, duke ndezur spekulime se familja po përpiqet të lërë pas konfliktet e muajve të fundit.
Megjithatë, fotografia romantike e Brooklyn-it u interpretua nga shumë ndjekës si një mesazh indirekt se ai vazhdon të qëndrojë në krah të Nicola-s, pavarësisht dramës familjare.
Në rrjetet sociale nuk munguan reagimet. Disa fansa e konsideruan postimin një deklaratë të bukur dashurie, ndërsa të tjerë e kritikuan publikimin e një momenti kaq privat.
“Ruajeni këtë vetëm për ju”, shkroi një komentues, ndërsa një tjetër shtoi:
“Nuk ka nevojë të ndash çdo moment intim me botën”.
Brooklyn dhe Nicola janë martuar që nga viti 2022, por prej kohësh përfliten për një raport të tensionuar me David dhe Victoria Beckham.
Edhe pse asnjëra palë nuk ka folur hapur për konfliktin, postimet në rrjetet sociale dhe mungesa e Brooklyn-it në disa aktivitete familjare kanë ushqyer vazhdimisht spekulimet se marrëdhëniet mes tyre mbeten të ftohta.
