Ajo që duhej të ishte dita më e bukur e jetës së tyre, u shndërrua në një përvojë zhgënjyese dhe plot incidente për një çift australian që kishte udhëtuar deri në Itali për t’u martuar në peizazhet romantike të Toskanës. Çifti kishte zgjedhur qytetin piktoresk të Pienzës, në provincën e Sienës, si vendin ideal për ceremoninë e tyre, duke paguar rreth 25 mijë euro për organizimin e dasmës. Por sipas mediave italiane, pothuajse asgjë nuk shkoi sipas planit.
Problemet nisën që në ceremoninë fetare, ku në broshurën e liturgjisë ishin shkruar gabimisht emrat e nuses dhe dhëndrit. Më pas, automjeti i marrë me qira për çiftin nuk ndizej dhe u desh të shtyhej që të lëvizte. Situata u përkeqësua edhe më tej gjatë pritjes. Sipas dëshmive, stafi i cateringut mungoi për një pjesë të konsiderueshme të aperitivit, ndërsa në tavolina mungonin gotat. Në një moment, dhëndri u detyrua të pinte ujë direkt nga shishja.
Torta e dasmës rezultoi shumë e vogël për numrin e të ftuarve dhe shumë prej tyre nuk arritën ta provonin fare. Po ashtu, disa biskota tradicionale australiane të sjella nga çifti nuk u servirën kurrë gjatë festës. Një tjetër incident i rëndë ndodhi kur një mike e çiftit, shtatzënë, ra në pishinë. Gruaja u transportua në spital për kontrolle mjekësore, ndërsa nusja dhe dhëndri u detyruan të largoheshin nga festa për ta shoqëruar.
Edhe momentet e vallëzimit nuk u dokumentuan siç duhet, pasi fotografët dhe kameramanët humbën një pjesë të aktivitetit për shkak të vonesave dhe problemeve të tjera organizative. Pas ngjarjes, çifti iu drejtua gjykatës. Gjykata e Grossetos vendosi në favor të tyre, duke dënuar kompaninë organizatore të dasmës me pagesën e rreth 19 mijë eurove dëmshpërblim dhe shpenzime ligjore. Ajo që duhej të ishte një kujtim i paharrueshëm romantik, përfundoi si një histori e mbushur me incidente dhe zhgënjime, që tashmë ka marrë vëmendje të madhe në mediat italiane.