Një ekip mjekësh në NYU Langone Health ka realizuar transplantin e parë në botë të mushkërive nga një dhurues HIV-pozitiv te një pacient HIV-pozitiv. Procedura konsiderohet një arritje historike, pasi zgjeron mundësitë për transplantim te personat që jetojnë me HIV, duke shtuar numrin e dhuruesve potencialë që më parë nuk mund të merreshin në konsideratë.
“Ky është një moment vendimtar për komunitetin e personave me HIV dhe përfaqëson progres të vërtetë drejt barazisë në transplantimin e organeve”, tha Sapna Mehta, drejtoreshë klinike e Institutit të Transplanteve në NYU Langone dhe një nga hartueset e protokollit kërkimor që bëri të mundur këtë ndërhyrje.
Sipas të dhënave, rreth 1.2 milionë njerëz në Shtetet e Bashkuara jetojnë me HIV. Falë përparimeve në terapitë antiretrovirale (ART), shumica e tyre mund të bëjnë jetë të gjatë dhe të shëndetshme, me një jetëgjatësi pothuajse normale dhe pa rrezik të transmetimit të virusit kur trajtimi ndiqet siç duhet.
Përfituesi i transplantit është 56-vjeçari Bertrand Nelson, i cili jeton me HIV prej afro 26 vitesh. Në vitin 2000, ai u diagnostikua me HIV dhe sarkoidozë, një sëmundje inflamatore që mund të prekë mushkëritë dhe organet e tjera. Për vite me radhë gjendja e tij mbeti nën kontroll, por në vitin 2021 ai u prek nga sëmundja e Legjionarëve dhe kaloi javë të tëra në spital për shkak të pneumonisë së rëndë.
Infeksioni aktivizoi sërish sarkoidozën, e cila filloi të dëmtonte mëlçinë e tij. Gjendja u përkeqësua gjatë vitit 2024, duke e bërë të varur nga oksigjeni për frymëmarrje. Mjekët e referuan në Institutin e Transplanteve të NYU Langone për vlerësim të mundshëm për transplant të mushkërive dhe mëlçisë. Në kuadër të programit kërkimor të krijuar sipas HOPE Act, Nelson u përzgjodh për një transplant të dyfishtë.