Një ngjarje e rëndë ka tronditur qytetin e Finale Ligure, në provincën e Savonës, ku tre anëtarë të së njëjtës familje janë gjetur të pajetë brenda banesës së tyre. Ngjarja dyshohet se ka ndodhur gjatë natës mes 2 dhe 3 shtatorit. Sipas rindërtimit paraprak të hetuesve, 59-vjeçari Daniele Baruzzo dyshohet se ka qëlluar me armë zjarri bashkëshorten e tij, Paola Siri, 60 vjeçe, me profesion arkitekte, si dhe djalin e tyre 14-vjeçar, Mattia. Më pas, burri dyshohet se i ka dhënë fund jetës.
Arma e përdorur në krim ishte e mbajtur ligjërisht, ndërsa Baruzzo, sipas autoriteteve, frekuentonte rregullisht poligonin e qitjes. Trupat u gjetën rreth mesditës së 3 shtatorit. Fqinjët kishin raportuar se kishin dëgjuar të shtëna gjatë orëve të natës, ndërsa ndërhyrja e autoriteteve u krye disa orë më vonë. Në banesë shkuan karabinierët, zjarrfikësit dhe ekipet mjekësore, por për tre personat nuk kishte më asgjë për të bërë.
Hetuesit kanë gjetur gjithashtu një shënim të lënë nga 59-vjeçari, i cili besohet se mund të hedhë dritë mbi arsyet që e çuan drejt aktit ekstrem. Përmbajtja e tij po shqyrtohet nga autoritetet. Hetimet po drejtohen nga karabinierët e Albengës, nën koordinimin e prokurores Maddalena Sala, ndërsa vijon puna për të rindërtuar me saktësi dinamikën dhe motivet e tragjedisë.
Mes viktimave është edhe Mattia, një futbollist i ri që aktivizohej në ekipin e të rinjve të Finale FBC. Lajmi ka shkaktuar dhimbje të madhe në komunitetin sportiv dhe atë lokal. Klubi i futbollit e ka kujtuar 14-vjeçarin përmes një mesazhi prekës në rrjetet sociale:
“Një tragjedi i ka marrë jetën një prej sportistëve tanë të rinj dhe ka goditur thellësisht të gjithë komunitetin tonë. Jemi të shkatërruar, të pabesueshëm dhe thellësisht të pikëlluar… Ciao, kampion i vogël. Buzëqeshja jote, angazhimi yt dhe kujtimi i momenteve të kaluara së bashku do të mbeten përgjithmonë pjesë e historisë së Finale FBC dhe në zemrat e atyre që të njohën.” Në shenjë zie, drejtuesit e klubit kanë vendosur të pezullojnë të gjitha aktivitetet e sektorit të të rinjve, përfshirë stërvitjet dhe ndeshjet, deri të dielën.