Kombëtarja e Francës siguroi kualifikimin për në 1/8-at e Kupës së Botës pas fitores bindëse 3-0 ndaj Suedisë, në një ndeshje ku protagonist ishte Kylian Mbappe me dy gola.
Por përveç suksesit të “Gjelave”, mbrëmja ishte historike edhe për trajnerin Didier Deschamps.
Tekniku francez u bë vetëm trajneri i katërt në historinë e Kupës së Botës që drejton një kombëtare në fazën me eliminim direkt në katër edicione të ndryshme të turneut.
Lista përfshin emra legjendarë si Oscar Tabarez (Uruguai), Bora Milutinovic dhe Sepp Herberger, ndërsa Deschamps iu bashkua këtij grupi elitar falë paraqitjeve me Francën në Botërorët e viteve 2014, 2018, 2022 dhe 2026.
Megjithatë, trajneri francez ka vendosur edhe një rekord unik. Ai është i vetmi trajner në historinë e Kupës së Botës që ka drejtuar të njëjtën kombëtare në katër Botërorë radhazi, një arritje që e veçon nga të gjithë kolegët e tij.
Nën drejtimin e Deschamps, Franca fitoi Kupën e Botës në vitin 2018, arriti në finalen e vitit 2022 dhe tani vazhdon rrugëtimin edhe në Botërorin 2026, duke konfirmuar vazhdimësinë dhe suksesin e një prej cikleve më të suksesshme në historinë e futbollit francez.
