Disa shkolla fillore dhe të mesme në Podgoricë janë evakuuar ditën e sotme, pasi kanë marrë kërcënime për bomba.
Policia malazeze tha se ka marrë masa lidhur me njoftimet dhe për sigurinë e nxënësve dhe qytetarëve, ndërsa shpjegon se kërcënimet kanë mbërritur nëpërmjet email-eve.
Menjëherë pas marrjes së informacionit, Ministria e Arsimit u rekomandoi të gjitha shkollave që nxënësit dhe punonjësit të largohen nga mjediset shkollore.
“Duke pasur parasysh se në periudhën paraprake jemi përballur me me raportime të këtij lloji, të cilat fatmirësisht kanë qenë të rreme, ministria u bën thirrje të gjithë qytetarëve që të veprojnë me qetësi dhe përmbajtje, sikurse në rastet e mëparshme”, thuhet në njoftimin e Ministrisë së Arsimit.
Alarmet e shumta që dolën të rreme për mjete shpërthyese të vendosura në shkolla ndodhën edhe në prill të këtij viti, kur të gjitha shkollat në Mal të Zi u evakuuan. Të njëjtat alarme janë dhënë dhe në kryeqytetitn e Maqedonisë së Veriut, Shkup.
Më 8 dhjetor u dha alarmi për lëndë shpërthyese në Gjykatën e Lartë në Podgoricë duke bërë që të ndërpriten të gjitha gjykimet dhe të evakuohen punonjësit e saj. Pas kontrollit doli se alarmi ishte i rremë.
