Një skandal i rëndë ka tronditur futbollin e Koresë së Jugut. Federata Koreane e Futbollit (KFA) është akuzuar se u siguronte dhe paguante shërbime seksuale arbitrave të huaj përpara dhe pas ndeshjeve ndërkombëtare. Sipas raportimeve të televizionit koreano-jugor “JTBC” dhe agjencisë “Yonhap”, praktika e pretenduar ka ndodhur gjatë viteve 2011 dhe 2012, ndërsa detajet janë rikthyer në vëmendje pas publikimit të dokumenteve të një auditimi qeveritar të vitit 2016.

Sipas këtyre dokumenteve, KFA dyshohet se përdorte karta krediti të federatës për të paguar shërbime në qendra masazhi dhe ambiente për të rritur në Seul dhe qytete të tjera ku zhvilloheshin ndeshjet. Pretendimet lidhen me rreth 20 zyrtarë të ndeshjeve në shtatë takime, mes tyre arbitra dhe koordinatorë nga Japonia, Emiratet e Bashkuara Arabe, Irani, Bahreini dhe Uzbekistani.

Ndeshjet në fjalë përfshinin edhe eliminatore për Kampionatin Botëror 2014 dhe Lojërat Olimpike të Londrës 2012. Gjatë shtatë takimeve të përmendura në raport, Koreja e Jugut nuk pësoi asnjë humbje, duke regjistruar pesë fitore dhe dy barazime. Megjithatë, raportimet theksojnë se nuk ka prova që këto shërbime të kenë ndikuar drejtpërdrejt në rezultatet e ndeshjeve.

Një ish-zyrtar i KFA-së i tha “JTBC”-së se në atë periudhë sigurimi i shërbimeve të tilla për arbitrat ishte konsideruar një praktikë e zakonshme. Sipas dëshmive të cituara nga mediat koreane, disa prej arbitrave madje kërkonin vetë që të dërgoheshin në ambiente të tilla. Auditimi qeveritar ishte kryer nga Ministria e Kulturës, Sportit dhe Turizmit në vitin 2016. Ministria kishte hetuar edhe më herët përdorimin e kartave të kreditit të federatës për shpenzime të papërshtatshme, por në atë kohë nuk kishte publikuar të gjitha detajet, pasi kishte vështirësi për të verifikuar plotësisht pretendimet.

Në reagimin e saj, KFA ka deklaruar se është e vështirë të verifikohen pas kaq shumë vitesh të gjitha përdorimet e kartave të kreditit. Federata ka pranuar se mund të kenë ndodhur “incidente të pakëndshme” rreth 15 vite më parë, por thekson se që prej atëherë ka vendosur rregulla të rrepta të brendshme për të parandaluar përsëritjen e rasteve të tilla.