Më 13 shtator, Ravello u kthye në skenën e një feste shumë private pasi Ilary Blasi dhe Bastian Muller kurorëzuan dashurinë e tyre në martesë, pas 4 vitesh lidhjeje.
Mediat italiane shkruajnë se, çifti zgjodhi Bregdetin Amalfitan për ceremoninë, ndërsa organizimi u mbajt larg syrit publik, me vetëm rreth 70 të ftuar.
Ceremonia u zhvillua në Villa Cimbrone, ndërsa dëshmitaret e Ilary-t ishin motra e saj Melory Blasi dhe Giorgia Lillo Lori, mikeshë e saj dhe bashkëshortja e një kushëriri të ish-bashkëshortit Francesco Totti.
Pranë nënës në ditën e saj të veçantë ishin edhe tre fëmijët, Cristian, Chanel dhe Isabel.
Më pas erdhi edhe formalizimi zyrtar i martesës. Dokumentet u firmosën në orën 18:40 në Palazzo Tolla, selia e bashkisë së Ravello-s.
Fotot dhe videot nga dasma janë mbajtur nën kontroll të rreptë, megjithëse disa pamje arritën të qarkullojnë. Në videot e publikuara nga një reporter i revistës Oggi, Bastian shihet duke festuar dhe ngritur dolli në rrugët e Ravello-s pas firmosjes së dokumenteve.
Ndërsa nga Ilary u pa vetëm një pjesë e look-ut të nusërisë: një slip dress nga Ermanno Scervino, i kombinuar me doreza të gjata të bardha.
Lista e të ftuarve ishte shumë e kufizuar dhe pothuajse pa personazhe të famshëm. E vetmja figurë e njohur që u pa në dasmë ishte Silvia Toffanin.
Miqësia mes Ilary Blasi dhe prezantueses së “Verissimo” zgjat prej më shumë se 20 vitesh, që nga koha kur të dyja ishin “Letterine” në programin Passaparola.
Edhe pse ndër vite janë përfolur herë pas here për kriza në marrëdhënien e tyre, prania e Toffanin në një dasmë kaq private duket se tregon se lidhja mes tyre mbetet shumë e fortë.
Gjatë viteve, Ilary ka zgjedhur shpesh pikërisht “Verissimo” për të folur për momente personale, emocione dhe çështje të rëndësishme të jetës së saj.
Mungesa e Michelle Hunziker nuk kalon pa u vënë re
Mes personazheve që nuk ishin të pranishëm ishte Michelle Hunziker.
Mediat italiane kanë raportuar prej kohësh për një ftohje mes saj dhe Ilary-t, megjithëse të dyja nuk kanë dhënë një version të plotë publik mbi arsyet e distancimit.
Në dasmë mungoi gjithashtu Gerry Scotti, një nga figurat që e shoqëruan Ilary-n në fillimet e karrierës së saj televizive gjatë Passaparola.
Nuk ishin të pranishme as Selvaggia Lucarelli dhe Cesara Buonamici, të lidhura profesionalisht me Blasi përmes projekteve televizive.
Në Ravello nuk ishte as Pier Silvio Berlusconi, partneri i Silvia Toffanin dhe administrator i deleguar i Mediaset, televizioni me të cilin Ilary Blasi bashkëpunon prej dekadash.
Megjithatë, Berlusconi u dërgoi çiftit një kompozim me lule dhe një kartolinë urimi.
“Të dashur Ilary dhe Bastian, shumë urime dhe një përqafim i përzemërt për këtë ditë të paharrueshme”, shkruhej në mesazh.
Zgjedhja e Ilary-t duket e qartë: sa më pak showbiz dhe sa më shumë privatësi.
Për Ilary Blasi, këto janë martesat e dyta pas divorcit nga Francesco Totti.
Lidhja me Bastian Muller nisi rreth katër vite më parë dhe për një kohë të gjatë është zhvilluar mes Italisë dhe Gjermanisë: Ilary jeton kryesisht në Romë, ndërsa ai ka bazën e tij në Gjermani, ku ka lindur dhe punon.
Tani, pas ceremonisë së 13 shtatorit, Bastian është zyrtarisht bashkëshorti i saj. Por për prezantuesen nuk do të ketë shumë kohë për pushime.
Ilary pritet të rikthehet menjëherë në punë, pasi më 16 shtator nis edicioni i ri i “Grande Fratello VIP” në Canale 5.
