Bota e spektaklit dhe e konkurseve të bukurisë është tronditur nga një ngjarje e rëndë e ndodhur së fundmi. Miss Venezuela 2025, Andrea del Val, ka publikuar një video dramatike nga një hotel në Kanë, ku pretendon se është dhunuar barbarisht nga stilisti i njohur, Giovanni Laguna.

Pamjet kanë bërë xhiron e rrjeteve sociale dhe kanë shkaktuar reagime të shumta në opinionin publik ndërkombëtar.

Në videon e publikuar nga vetë modelja, 29-vjeçarja shfaqet me fytyrën e mbuluar me gjak, teksa filmon me telefon ambientin e dhomës së hotelit, ku mobiliet dhe objektet duken të përmbysura dhe të shpërndara në dysheme. Atmosfera në dhomë është kaotike, ndërsa ajo duket e tronditur dhe emocionalisht e rënduar.

Në të njëjtën video shihet edhe stilisti venezuelian, i ulur në një pjesë të dhomës, ndërsa Andrea dëgjohet duke thënë: “Shikoni çfarë më bëri Giovanni Laguna. Urime Giovanni, kjo ishte ajo që doja, që të tregosh kush je në të vërtetë”.

Sipas raportimeve të mediave ndërkombëtare, incidenti ndodhi në një hotel luksoz në Kanë, ku të dy ndodheshin gjatë aktiviteteve të lidhura me eventet e modës dhe Festivalin e Filmit. Mysafirët e hotelit kanë njoftuar menjëherë policinë pasi dëgjuan britma, goditje dhe zhurma të forta që vinin nga dhoma ku ndodhej çifti.

Pak minuta më vonë, forcat e policisë franceze mbërritën në vendngjarje. Në videot që qarkulluan më pas në rrjetet sociale, Giovanni Laguna shihet duke u shoqëruar nga oficerët jashtë hotelit, ndërsa Andrea del Val po merrte ndihmë mjekësore për plagët e marra.

Sipas burimeve mediatike, modelja është trajtuar menjëherë nga mjekët dhe ndodhet jashtë rrezikut për jetën, megjithatë nuk janë bërë publike detaje të sakta mbi natyrën e dëmtimeve të saj.

Deri tani, autoritetet franceze nuk kanë konfirmuar zyrtarisht nëse ndaj Giovanni Laguna janë ngritur akuza penale, ndërsa çështja mbetet nën hetim. Hetuesit po analizojnë pamjet filmike, dëshmitë e personave të pranishëm në hotel dhe materialet e publikuara në rrjetet sociale për të sqaruar plotësisht rrethanat e incidentit.

Giovanni Laguna konsiderohet një emër i njohur në industrinë e modës dhe konkurseve të bukurisë në Amerikën Latine. Ai ka bashkëpunuar prej vitesh me modele dhe miss-e të njohura, ndërsa që prej vitit 2023 mban postin e drejtorit kreativ të Miss Universe Colombia.

Ndërkohë, rrjetet sociale janë mbushur me reagime pas publikimit të videos së Andrea del Val. Shumë përdorues kanë kërkuar drejtësi për modelen venezueliane dhe kanë bërë thirrje për hetim të plotë të ngjarjes, ndërsa të tjerë kanë shprehur tronditjen për pamjet e rënda të publikuara nga brenda dhomës së hotelit në Kanë.