Michiel Vandeweert, krijuesi belg i përmbajtjeve, është ndarë nga jeta në moshën 28-vjeçare, pas një jete me progerian, një çrregullim të rrallë gjenetik që shkakton plakje të përshpejtuar. Mjekët i kishin thënë familjes së tij se ai me shumë gjasë do të jetonte vetëm deri në moshën 12-vjeçare. Michiel e tejkaloi parashikimin me më shumë se dyfish, duke u bërë një nga personat më të mëdhenj në moshë që ka jetuar me këtë sëmundje.
Ai dokumentoi për vite me radhë jetën e tij në rrjetet sociale, duke ndarë përditshmërinë me progerian dhe duke krijuar një komunitet prej më shumë se 90 mijë ndjekësish në Instagram, YouTube dhe Twitch. Në moshën 15-vjeçare publikoi edhe librin autobiografik Ik Ben Michiel, ku rrëfente jetën e tij dhe përballjen me një sëmundje që i kishte shkurtuar ndjeshëm jetëgjatësinë.
Historia e tij u bë edhe dokumentar. Michiel dhe motra e tij 20-vjeçare, Amber, e cila gjithashtu jeton me progerian, ishin protagonistët e dokumentarit How To Be Alive: Amber and Michiel. Familja e tij konfirmoi ndarjen nga jeta për transmetuesin belg VRT NWS. Shkaku i vdekjes nuk është bërë publik.