Një ngjarje e rëndë po hetohet në Torino, ku një fëmijë 5-vjeçar u përplas nga një automjet ndërsa po ecte në këmbë me familjarët. Ngjarja ndodhi mbrëmjen e së shtunës, më 26 shtator, në kryqëzimin e rrugëve via Pinelli dhe via Industria, në lagjen San Donato. Sipas rindërtimit paraprak të policisë, makina ka humbur drejtimin në kryqëzim dhe ka goditur fëmijën, ndërsa dyshohet se më herët drejtuesja e automjetit kishte tentuar të përplaste edhe babain e tij. Pas ngjarjes, gruaja 24-vjeçare, shtetase italiane, është larguar nga vendi i aksidentit.
Ajo është ndaluar më pas nga karabinierët, ndërsa hetuesit po përpiqen të përcaktojnë nëse bëhet fjalë për një aksident apo për një veprim të qëllimshëm. Babai i fëmijës, me origjinë marokene, dyshohet se e ka njohur drejtuesen e automjetit dhe u ka thënë autoriteteve: “Është ish-partnerja ime”. Kjo deklaratë ka shtuar dyshimet për një konflikt të mundshëm personal dhe për një akt hakmarrjeje, por motivi dhe rrethanat e sakta të ngjarjes mbeten ende objekt hetimi.
Pas përplasjes, në vendngjarje mbërritën ekipet e urgjencës së 118 të Azienda Zero. Fëmija pësoi një frakturë në zonën e barkut dhe u transportua për trajtim në spitalin Regina Margherita. Sipas mjekëve, ai ka qëndruar gjatë gjithë kohës i vetëdijshëm dhe nuk është në rrezik për jetën. 24-vjeçarja është ndaluar nga karabinierët dhe ndaj saj po zhvillohen hetime për tentativë vrasjeje, ndërsa autoritetet po vijojnë të mbledhin prova për të sqaruar dinamikën dhe motivin e ngjarjes.