Momente paniku në Çmimin e Madh të Italisë! Charles Leclerc përfundoi jashtë gare pas një aksidenti të frikshëm në pistën e Monzas, ndërsa piloti i Ferrarit zbuloi më pas një detaj që i shqetësoi të gjithë. Leclerc humbi kontrollin e Ferrarit të tij në një prej pjesëve më të shpejta të pistës dhe u përplas fuqishëm me barrierat. Makina u dëmtua rëndë, ndërsa piloti 28-vjeçar arriti të dilte vetë prej saj. Por menjëherë pas aksidentit, Leclerc përjetoi një problem që nuk lidhej vetëm me goditjen fizike.
Piloti i Ferrarit tregoi se për disa momente nuk arrinte të shihte mirë me syrin e djathtë. “Syri i djathtë nuk më jepte shikim shumë të mirë, por tani gjithçka është në rregull. Kjo ishte gjëja për të cilën isha më i shqetësuar kur dola nga makina”, rrëfeu Leclerc.
Deklarata e tij ka ngritur pikëpyetje për gjendjen e pilotit për garën e ardhshme. Edhe pse kontrollet e para nuk kanë evidentuar probleme serioze, Leclerc do t’i nënshtrohet ekzaminimeve të tjera për t’u siguruar se është në gjendje të rikthehet në Formula 1. “Do të kem disa kontrolle shtesë sonte dhe nesër për t’u siguruar që do të jem plotësisht mirë për Madridin. Duhet të jetë kështu, por më mirë të jesh i sigurt sesa të pendohesh”, tha ai. Leclerc e kishte nisur garën nga vendi i tretë dhe po luftonte në pjesën e përparme kur Oscar Piastri i McLaren filloi t’i afrohej.
Teksa përpiqej të mbronte pozicionin, Leclerc doli jashtë trajektores në zonën e Parabolica-s. Rrota e pasme e majtë preku pjesën anësore të pistës dhe Ferrari humbi menjëherë stabilitetin. Makina doli me shpejtësi nga pista, kaloi në zhavorr dhe u përplas fuqishëm me barrierat e gomave. Pamjet e aksidentit shkaktuan shqetësim të madh, ndërsa Leclerc u pa më pas i ulur në bar, duke u kontrolluar nga ekipet mjekësore.
Përplasja solli edhe ndërprerjen e garës, pasi barrierat u dëmtuan dhe duhej të riparoheshin. Për Leclerc, zhgënjimi ishte edhe më i madh pasi aksidenti ndodhi në garën e shtëpisë së Ferrarit. Ai u detyrua të largohej nga gara pa marrë pikë. Tashmë pyetja që shqetëson fansat e Ferrarit është një: A do të jetë Charles Leclerc 100% gati për garën e ardhshme në Madrid?