Një rast i rëndë personal ka rikthyer në qendër të debatit çështjen e vdekjes së asistuar në Mbretërinë e Bashkuar, pasi një nënë britanike ka ndarë publikisht vendimin e saj për t’i dhënë fund jetës. Wendy Duffy, 56 vjeç, e përshkruar si fizikisht e shëndetshme dhe në gjendje të plotë mendore, ka marrë vendimin pas humbjes tragjike të fëmijës së saj të vetëm. Ajo ka planifikuar të udhëtojë drejt Zvicrës për të kryer procedurën në një klinikë të specializuar për vdekje të asistuar.
Rasti i saj ka shkaktuar reagime të forta në opinionin publik dhe në politikë, duke thelluar ndarjen mes atyre që mbështesin të drejtën individuale për të vendosur mbi jetën dhe atyre që paralajmërojnë për rreziqet e një legalizimi të tillë.
Në Britani, legjislacioni për vdekjen e asistuar mbetet i diskutueshëm dhe një projektligj për këtë çështje pritet të mos miratohet në këtë sesion parlamentar, pasi nuk ka kohë të mjaftueshme për shqyrtim në Dhomën e Lordëve
Ndërkohë, organizata kundërshtare të kësaj praktike argumentojnë se raste të tilla tregojnë rrezikun e zgjerimit të kritereve për përfitim nga vdekja e asistuar, duke përfshirë edhe persona që nuk janë në fazë terminale të sëmundjes.