Një 31-vjeçar i shpallur në kërkim ndërkombëtar është arrestuar ditën e sotme në Krujë.
Mësohet se në pranga ka rënë shtetasi Nikoll Dobrazi, i cili është dënuar nga drejtësia italiane me 8 vjet, 4 muaj e 10 ditë burgim, pasi akuzohet për një sërë vjedhjesh që ai ka kryer në qytetin italian Trieste.
31-vjeçarit i kanë mbetur për të kryer nga dënimi edhe 7 vite, 7 muaj dhe 20 ditë burg, për të cilat do ekstradohet drejt shtetit fqinj.
Njoftimi i policisë:
Finalizohet operacioni policor i koduar “Trieste”, për kapjen e një shtetasi në kërkim ndërkombëtar.
Lokalizohet në Krujë dhe arrestohet përkohësisht, për t’u ekstraduar drejt Italisë, 31-vjeçari i dënuar me mbi 8 vjet burgim, për vjedhje në rrethana rënduese, në Itali.
Specialistët për Hetimin e Krimeve të Komisariatit të Policisë Krujë, në vijim të punës për lokalizimin dhe vënien në pranga të shtetasve të shpallur në kërkim, si rezultat i bashkëpunimit me Interpol Tirana, në kuadër të operacionit policor të koduar “Trieste”, kapën dhe arrestuan përkohësisht, me qëllim ekstradimin drejt Italisë, shtetasin:
-Nikoll Dobrozi, 31 vjeç, banues në Krujë.
Gjykata e Apelit Trieste, Itali, e ka dënuar këtë shtetas, me 8 vjet, 4 muaj e 10 ditë burgim, për veprën penale “Vjedhja në rrethana rënduese”, nga të cilat i kanë mbetur për të kryer 7 vjet, 7 muaj e 20 ditë.
Në bashkëpunim me ZQK Interpol Tirana, vijon puna për ekstradimin e 31-vjeçarit, drejt Italisë.
Materialet procedurale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme.